ब्रेकिंग

महाराष्ट्र

सावरकरांच्या देशभक्तीवरील गाण्याचा गौरव

Samruddhi Dhayagude
28 May 2025

छत्रपती संभाजी महाराज राज्य प्रेरणा गीत पुरस्कार प्रदान

मुंबई : स्वातंत्र्यवीर विनायक दामोदर सावरकर यांच्या अनादी मी अनंत मी या देशभक्तीवरील गाण्याचा गौरव राज्य सरकारने मंगळवारी केला. त्या अंतर्गत गाण्याला पहिला छत्रपती संभाजी महाराज राज्य प्रेरणा गीत पुरस्कार काल देण्यात आला.

सावरकर यांच्या जयंतीच्या पूर्वसंध्येला मुख्यमंत्री देवेंद्र फडणवीस यांचे शासकीय निवासस्थान वर्षा येथील कार्यालयात पुरस्कार वितरण सोहळा झाला. स्वातंत्र्यवीर सावरकर यांचे पणतू रणजित सावरकर यांनी स्वातंत्र्यवीर सावरकर फाउंडेशनतर्फे हा पुरस्कार केंद्रीय गृहमंत्री अमित शहा यांच्या हस्ते स्वीकारला. दोन लाख रुपये रोख आणि स्मृतिचिन्ह असे पुरस्काराचे स्वरुप होते. या प्रसंगी फडणवीस, उपमुख्यमंत्री एकनाथ शिंदे, सांस्कृतिक मंत्री आशिष शेलार आदी उपस्थित होते.

दरम्यान, राज्याच्या सांस्कृतिक विभागाने नागरिकांना प्रेरणा देणार्‍या व्यक्तींच्या गाण्यांना दरवर्षी छत्रपती संभाजी महाराज राज्य प्रेरणा गीत पुरस्कार देण्याचे जाहीर केले होते. त्याअंतर्गत पहिला पुरस्कार अनादी मी अनंत मी गाण्याला जाहीर केला होता. सांस्कृतिक मंत्री आशिष शेलार यांनी सांगितले की, छत्रपती संभाजी महाराजांचे जीवन नागरिकांसाठी प्रेरणादायी आहे. त्यामुळे त्यांच्या नावाने पुरस्कार सुरू केला आहे. ते म्हणाले, सावरकर प्रखर देशभक्त, विचारवंत, महाकवी होते. त्यांनी विपुल लेखनही केले आहे. अनादी मी अनंत मी हे गाणे अंतर्मनाच्या ताकदीचे दर्शन घडविणारे आहे. त्यामुळे त्याची पुरस्कारासाठी निवड केली होती.